Tuesday, 5 July 2011

NATIONAL TREASURE


    देवाचा खजिना की राजाचा ?  खजिना सापडला यावरुन कधीकाळी भारतात सोन्याचा धूर निघत होता असं का म्हणायचे, याचं उत्तर सापडलं. अर्थात पद्मनाभस्वामी मंदीरात सध्या जी मोजदाद चालू आहे ती बाजार मुल्याची. खजिन्याचं, नेमकं मुल्य किमान 100 लाख कोटींवर जाईल. विषय अर्थात केरळतल्या पद्मनाथ मंदिराचा.
     आता पुढची चर्चा होणार ती त्याच्या दुर्मिळता मुल्याची... हत्ती सोन्याचा, माणसं सोन्याची अगदी अडीच किलोची सोनसाखळी सारं अजब पोत्यानं सोन्याचे दाणे आणि नाणे सोबत हिरे, माणकं आणि पाचूचे पाते काय कमाल आहे ना....
     खरा सवाल हा खजिना कुणाचा राजाचा की मंदिराचा. चढाओढीच्या स्पर्धेत चॅनेलवाल्यांनी आता कोणतं देवस्थान श्रीमंत असा नवा विषय समोर आणला आहे. मुळात आम्ही भारतीय देवभोळे त्यामुळेच तिर्थयात्रा ही आमची परंपरा. भगवंताचा झेंडा हाती घेऊन पंढरीची वारी करणारा इथला समाज. राजकीय झेंडे हाती आल्यावर दुस-या वा-या करणारी नवी पिढी सारं बदलत जाणारं समीकरण.
     तिरुपती देवस्थान श्रीमंत की वैष्णोदेवी असा सवाल टीआरपी रेटींग विचारल्यागत वाटतो. एका चॅनेलने तर त्या रकमेचा विनियोग करीत ९५ एफ-17 विमाने खरेदी करुन टाकली याला म्हणतात कोटीच्या कोटी उड्डाणं.                                            
चॅनेलवाल्यांना दळायला आणि तमाम मध्यमवर्गीयांना चघळायला एक चांगला विषय या निमित्तानं मिळालाय हे स्पष्ट आहे. किचनमधून टिव्हीवरची ती नेत्रदीपक बातमी बघताना त्या गृहिणीला मात्र आपला राहून गेला करायचा असो चपलाहार आठवला असणार.
     आता हा खजिना ट्रस्टकडे राहणार की देशाची संपत्ती म्हणून जमा होणार यावर खल सुरु होईल. योगी रामदेव बाबांच्या संपत्तीवर चॅनेल्सनी चर्चा केली त्यानंतर सत्य साईबाबांच्या संपत्तीवर चर्चा झाली. कधी काळी अशीच चर्चा ओशांच्या 99 मर्सडिज कारची झाली होती. तुम्हा आम्हाला चर्चा करायला खूपच आवडतं ना.
     यावर टिव्हीवर ` सो कॉल्ड ` आणि कधी ख-या असणा-या तज्ञाचं चर्चासत्र होईल. त्यावर एसएमएसने मतं मागितली जातील आणि लोकं पैसा खर्च करुन मतं देतीलही वेळ आणि पैसा खूप आहे ना. हे समजलं पण या मतदानात हो किंवा नाही या पर्यायाला सोडून मधला मार्ग स्वीकारणारे ते  ` तटस्थ ` का मतदान करतात हे अद्याप कळलं नाही.
                           प्रशांत दैठणकर

No comments:

Noorie